استدعى الاب ابنه لغرفته وما ان رأه امامه الا وبادر بتوجيه هذا السؤال
الاب : هتعرف يابنى تحافظ على الثروه اللى هتورثها من بعدى
الابن : طبعا يا ابا تربيتك
الاب : يعنى هتعرف تربى الكتاكيت زى ما انا ربيتهم
الابن : ( باندفاع وحماسه الشباب ) اكيد يا ابا
الاب : طيب هات الكرتونه اللى فيها الكتاكيت دى
سارع الابن باحضار الكرتونه ووقف امام ابيه
الاب : اقلب الكرتونه على الارض وورينى ازاى هتقدر تلم فيها الكتاكيت
وبسرعه قلب الابن الكرتونه وما ان رفعها حتى انطلقت الكتاكيت
فى ارجاء الغرفه واندفع الابن خلفها يحاول جمعها مره اخرى لكن
هيهات ، وبعد ان ادرك الفشل وقف امام ابيه وقد ارتسمت على
وجهه البلاهه والغباء ولم يوقظه الا صفعه قويه من ابيه
الاب : شوف يا غبى اللى هاوريهولك ده خلاصه 25 سنه فى تربيه الكتاكيت
ثم اخذ الاب الكرتونه بعد ان جمعا فيها الكتاكيت اخذ يهزها بقوه
يمينا ويسارا وسط صراخ متواصل من الكتاكيت ما لبس ان تلاشى
وانقطع نتيجه ما اصابها من اعياء
الاب : الان فقط نقلب الكرتونه
وما ان رفعها الا وشاهد الابن الكتاكيت لا تحرك ساكنا مما
اصابها من اعياء ودوار ثم قام بتعبئتها فى الكرتونه بمنتهى
السهوله واليسر
الاب : الوقت يا ابنى اتعلمت اهم حاجه فى تربيه الكتاكيت وهى
( اتعبهم يريحوك لكن لو ريحتهم هيتعبوك )
لو عرفت مين هو الاب ومين هو الابن ومين هما الكتاكيت ؟
تبقى جدع
ادخل عشتك وخليها فى سرك
الايميل ده وصلني من واحده صديقه واخت غاليه علي جدا مقيمه خارج مصر وهي دايما تتحفني بايملات خطيره فعلا ونظرا لاني منعت اصدقائى من خارج المدونات انهم يعلقوا هنا ويكتفوا بتعليقاتهم بيني وبينهم الا انه لازم اشكرها علي الايميل البديع واتمني يعجبكم ولو عرفتوا تبقوا قابلوني في ليمان طره ان شاء الله
كتبها cinderella في 12:18 مساءً ::
98 تعليق
في11,تموز,2007 - 03:34 صباحاً, محمد حماد كتبها ...
الأخوة الأعزاء
تعالوا ندون غدا من اجل العالقين على معبر رفح.
تعالوا نبدأ غدا حملة التضامن مع أخوة لنا في العروبة وفي الدين.
تعالوا نقول للجميع: خلوا عندكم دم، خلوا عندك وطنية، خلوا عندكم إنسانية.
تعالوا نصرخ في وجه الجميع كفى هزلا في مواضع الجد..
تعالوا نقول لهم جميعا: حرام عليكم يا ظلمة..
تعالوا نقول لهم جميعا: افتحوا المعبر الآن وليس غدا.
في11,تموز,2007 - 05:23 صباحاً, قويدر النديم كتبها ...
أختي سندرلا
أخشى أن يكون الابن الحقيقي يفكر في تسميم الكتاكيت قبل قلب الكرتونة
في بلادي حتى يهدأ الشعب و يطيع سلطت عليه فرق القتل الجماعي مما أدى الآن إلى الطاعة العمياء
تحياتي و تقديري
في11,تموز,2007 - 07:53 صباحاً, سارة كتبها ...
العزيزة سندريلا
عارفة المشكلة ايه
ان الكتاكيت مش بتفوق اساسا
ودايخة على طول وبتدخل الكرتونة بمزاجها كمان
بس عشان منظلمش الكتاكيت
25 سنة تدويخ من الاب كتير
من الابن بقى هيبقى حرااااااااااااااااام
تحيااااااااااااااااتى
في11,تموز,2007 - 09:36 صباحاً, ابنة الكرك كتبها ...
عزيزتي سندريلا
جميلة جدا القصة, اعتقد انها تنفع في التدريس في المدرسة وتربية الاطفال ربما هي اسلوب التعامل مع الشعوب ايضا .
تحياتي لك
في11,تموز,2007 - 09:53 صباحاً, ايمن مصطفى كتبها ...
طب اقولك ايه
انت عارفة ان الكتاكيت بنفسها طالبة مدرب خاص للهز؟؟؟
يعنى حتى لو الابن بطل هز الكتاكيت عاوزه هز
ادى ظهرك للكرتونة وقولى جاى
خلى كلامنا خفيف عليهم...............الكراتين طبعا
في11,تموز,2007 - 11:26 صباحاً, دمعة فى زمن الجفاف كتبها ...
سندريلا انتى قصدك تقولى ان الاب دة هو اب مبارك علشان بيعلم ابنه خبرة 25 سنة
مش كدا ولا ايه
اما بئة الابن فهو جمال يعنى بتاع جمال مش كتاكيت
له فى الجمال يركبها ويبركها على الارض وعشان كدا لما بيتعامل مع الكتاكيت ياعينى بيتعبوه لكن على مين البركة فى الاب المبارك ربنا يخليه لابنة الجمال ولكتاكيته المتعبين
مش دةقصدك برضة يا سندريلا ؟
في11,تموز,2007 - 11:47 صباحاً, منال لطفى كتبها ...
الاخت سندريلا*********ولية ندخل العشة الاب مبارك والابن جمال واحنا الكتاكيت وبرضة مش هندخل العشة ادعوكى لزيارة اخر ادراجين لى الكارثة الكبرى وجريمة فى جامعة عين شمس
في11,تموز,2007 - 12:10 مساءً, هبه خطاب كتبها ...
سندريلا
ماهى زينات صدقى كانت بتحط كتاكيت فى القبعة التى كانت تريدها فى الافلام كاتكيته بنى ...يبقى بقى هى اشطر من صاحبنا بتاع الكرتونه اللى بيدوخ الكاكتيت فى الكرتونة منذ اكثر من 25 سنة مع ان الكاتكيت دخية منذ اول سنه فى الكرتونة ....
في11,تموز,2007 - 12:46 مساءً, cindrella كتبها ...
الاخ قويدر النديم
ماهي دي الكارثه انه الكتاكيت يا دايخه يا مطحونه يا مسجونه
انا بقي نقسي تبقي الكتاكيت ديوك كبيره وواعيه علشان تعرف تتعامل مع الاشكال دي
تقبل تحياتي وتقديري
في11,تموز,2007 - 12:49 مساءً, cindrella كتبها ...
العزيزه ساره
يا ستي انتي بتتكلمي علي 25 سنه طيب دول من سنه 52 اول ناس لموهم في الكرتونه
ومن بعدها كل واحد بيلاعبهم بطريقته
اللى يقفل عليهم الكرتونه وميفتحهاش الا علي الاخره
واللي يجوعهم
واللى يدوخهم
والكتاكيت علشان بقالها سنين كده خلاص اتعودت علي ده
عارفه زى العصفور اللى بنربيه في البيت لو فتحتي له القفص مش هيطير لانه اتعود علي القفص والاكل مجانا والناس بتتفرج عليه
تحياتي
وعاوزه بقي اشوف ابداعاتك انتي مكسله ليه؟
مش انتي يا ساره اللى تتاخر ومش متهيالي انه لسه في امتحانات متتاخريش علينا
تقبلي تقديري
في11,تموز,2007 - 12:51 مساءً, cindrella كتبها ...
ابنه الكرك
المقصود فعلا هو الجزء الاخير من تعليقك
تقبلي تحياتي وتقديري لرأيك واهلا بك في كل وقت
في11,تموز,2007 - 12:53 مساءً, cindrella كتبها ...
ايمن
لا المقطع الاخير هو اللى صح
( اتعبهم يريحوك لكن لو ريحتهم هيتعبوك )
الله لا يريحهم لا دنبا ولا اخره
قول امين
طبعا قصدي عم فرحات بتاع الكتاكيت اللى علي الناصيه اصله مدوخهم ومجوعهم ومشحتفهم خالص
تحياتي
فين الجديد بتاعك؟
في11,تموز,2007 - 12:55 مساءً, cindrella كتبها ...
دمعه في زمن الجفاف
حياتي انا حاجزالك جنبي جناح في سجن ليمان طره
اهى بيكي في الصالون يا غاليه
بقي انتي كده تكشفي السر
انا عموما هاعترف من اول قلم مش هخبي هههههههه
تحياتي لك ولقلمك الحر
في11,تموز,2007 - 12:57 مساءً, cindrella كتبها ...
العزيزه منال لطفي
انتي اصلا خرجتي من العشه امتي؟وخرجتي ازاي؟
هازورك حالا مع اني اصلا متابعاكي علي طول
تحياتي
في11,تموز,2007 - 12:58 مساءً, cindrella كتبها ...
صديقتي العزيزه هبه خطاب
يا ينتي الكتاكيت دايخه من اكتر من 50 سنه من سنه 52 ومحدش راحمها لحد ما اخدت علي الدوخه والسطله اللى هي فيها
حسبي الله ونعم الوكيل
تحياتي
في11,تموز,2007 - 01:13 مساءً, أسامة مصطفى كتبها ...
إمتنعت عن التعليق على إدراحي الأخير..
وتتوقعين أن يعلق من يكتب بلا مواربة على إدراج الكتاكيت هذا؟؟
شئ عجيب يا سندريلا!
أرجو منك لطفا أن تقرأي ردي على بصمتك في مدونتي
أما قصتك المطروحة هنا، فهي معبرة بدون أية إيضاحات...
وهي بالفعل قصة تستأهل الإدراج
تحياتي
في11,تموز,2007 - 01:13 مساءً, عماد السامرائي كتبها ...
ما شاء الله .... كلنا حافظين الدرس .. مع اننا كلنا في غيبوبة ..... على فكرة .. هذه كانت طرفة لدينا ... من سنين طويلة في العراق ..... فقط كانت القصة تدور حول مجموعة من الفئران ..... تقبلي تحيتي
في11,تموز,2007 - 01:30 مساءً, cindrella كتبها ...
استاذ اسامه
انا امتنعت لاني لا علم لي ولا ثقافه في هذا الموضوع بمعني
انه مش لازم اقول اي كلام فارغ علشان ابقي بعلق وانت تروح ترد علي والكلام ده لانه عيب قوي بين ناس مثقفه
انا بعلق واكتب لما يكون لي رأي معين او هدف عاوزه اقوله
بس موضوع انك تقول انتي ممتنعه عن التعليق وعاوزه الناس تعلق عندك؟
معتقدشي انه كلام في محله ومتأكده انه حضرتك متقصدشي المعني اللى ممكن يوصله اللى بيقرأ الكلام ده؟
ولو حضرتك عاوز تعليق من بتوع والله انت هايل ومفيش زيك
فانا الحقيقه مش من منهم
انا بعلق لما يكون لي تعليق ممكن ينفع او حتي يثير حوار
وانا قولت لحضرتك انك اديتلنا فكره هايله عن الموضوع ووضحت حاجات انا نفسي لا اعرفها
عموما
اشكرك علي الزياره والتعليق
تحياتي وتقديري
بالنسبه لموضوع الكتاكيت
طبعا انا لا اقصد بالمره انه الناس لا تعلق ولا تقول مين؟
انا واخدها مزحه وحضرتك ممكن تشوف التعليقات الردود علشان تتاكد
احنا هنا بنكتب اللى نحبه وبنعبر عن رأينا بحريه ومفيش معني اننا نخبي او ندارى
تحياتي
في11,تموز,2007 - 01:31 مساءً, cindrella كتبها ...
استاذ عماد السامرائي
حقا كلنا نعرف الدرس ومن الفئران الي الكتاكيت يا قلبي لا تحزن فكلهم في الكرتونه سواء
تقبل تحياتي وتقديري
في11,تموز,2007 - 02:02 مساءً, النورس كتبها ...
والله الدوخه مقدور عليها يمكن بعدها الكتاكيت تفوق ... المصيبه فى الموت .... فماذا يفعل الابن فى كتاكيت ميته؟؟؟
شكرا
في11,تموز,2007 - 02:05 مساءً, cindrella كتبها ...
النورس
بالعكس ده الموت احسن للكتاكيت في نظر المحظوظ الابن
علشان يعرف يجيب كتاكيت تانيه يربيها علي ايده هو لانه ممكن كتاكيت ابوه تكون اتعودت علي الهز وممكن تفوق؟
فالابن يدعو الله وكاشف راسه انه يخلصه من الكتايكيت التعبانه دي وخصوصا انه الاب مص دمها خالص ومعدشي عندها حاجه يتمتع بيها المحظوظ الصغير فيبقي احسن وحتي كمان الكرتونه تفضي شويه
تقبل تقديري واحترامي
في11,تموز,2007 - 02:09 مساءً, أيمن بركات كتبها ...
الفاضلة / سندريلا
لا أنكر أن الكتاكيت التي تجمعها هذه الكرتونة في قمة الدوخان
ومنها من يموت اختناقا ، ولكن ألا ترين أن 25 في الكرتونة كانت كفيلة بأن تخلق
من هذه الكتاكيت ديوكا ودجاجا ، والغريب أن تمر هذه الفترة بمرارتها
والكتاكيت تظل كما هي لا تتغير
ليه بس يا سندريلا أيقظتِ غصة ما نسيناها
لك خالص التقدير
أدام الله قلمك النابض الحر
في11,تموز,2007 - 02:12 مساءً, cindrella كتبها ...
الاخ الكريم ايمن بركات
طيب ماهو ده المطلوب انه الكتاكيت تصحي وتفوق ولا انت ايه رايك؟
تحياتيى وتقديري
في11,تموز,2007 - 02:33 مساءً, وائل عزيز كتبها ...
لو كنت مكان الابن... وطلب مني لم الكتاكيت بعد اخراجهم من الكرتونة... كنت هاجيب شوية حبوب واحطهم في الكرتونة... واعقد من بعيد اتفرج عليهم وهم بيلعبوا وسعدا جوه الكرتونة وحواليها...
قلت لكم ابقى ريس وما رضيتوش...
انتو أحرار يا كتاكيت...
(بالمناسبة أنا مثلك ... أعلق فقط عندما اعتقد أن تعليقي يمكن أن يضيف جديداً... موضوعاتك السابقة جميلة جداً... لدرجة أن تعليقي عليها لن يضيف جديداً.
بالمناسبة الأخرى أرسل إليك البريد الاكتروني للأستاذة هدى أمين بناء على طلبك وطلب الأستاذة علا الفولي... لاتوفيق ان شاء الله...
دمت متألقة.
في11,تموز,2007 - 02:39 مساءً, هيثم ابوخليل كتبها ...
الأخت الفاضله سندريلا ..... الله ينور موضوع طريف ...تحياتي
في11,تموز,2007 - 02:43 مساءً, باسل فلسطين كتبها ...
الاب اي حاكم عربي
الابن هو الوريث
والكتاكيت هم من يرضون ان يكونو كتاكيت في كرتونة...
سندريلا اشكرك لمرورك بمدونتي وشكرا لتعليقك
بالنسبة للمقاومة الفلسطينية فمهما بلغت سوف تزعج اسرائيل لكن تحرير فلسطين بحاجة لجيش وبالنسبة للسلاح الذي ظهر في ايدي حماس وفتح في غزة فانا ايضا اتسائل عن مصدره ولماذا لا يوجه لاسرائيل...عموما الدول العربية بتمنع السلاح عن الفلسطينيين خاصة الاردن
فلسطين يجب ان تكون قضية اسلامية لان المسلمين امة واحدة ومصيرهم واحد والحدود هي حدود مصطنعة يعني فلسطين بالنسبة لمصر مثل الاسكندرية ...والاقصى مسجد مرتبط بالعقيدة الاسلامية فهي قضية كل مسلم ...اليهود بيعرفوا هاد الكلام جيدا وبيعتبروا كيانهم وطن كل يهودي...
نحن امة واحدة لكن يفرقنا الحكام
شكرا لك
ولا تحرمينا من زياراتك
في11,تموز,2007 - 02:45 مساءً, cindrella كتبها ...
د.وائل
ماهو انت لو بقيت الريس هتخلينا برضه جوه الكرتونه؟
طيب وبعدين عاوزين منبقاش في كرتونه ويبقي لينا حق نروح كل حته وبعدين نرجع للكرتونه بمزاجنا واحنا شبعانين ومش دايخين
انا عارفه انه حضرتك صاحب فكر ورأي وعموما تعليقك يسعدنا ويثرينا دايما
انا هستني الايميل الخاص بالمحاميه دي والاهم مش عارفه هنترجهم انجليزي ولا فرنساوي
تحياتي
في11,تموز,2007 - 02:47 مساءً, cindrella كتبها ...
الاخ هيثم ابو خليل
حمد لله علي السلامه وعمره مقبوله ان شاء الله
عقبال الحج باذن الله لك ولينا اجمعين
تحياتي
في11,تموز,2007 - 02:55 مساءً, cindrella كتبها ...
الاخ باسل الفلسطيني
الموضوع كما وصفت واعتقد كلنا كتاكيت او فئران كما قال الاستاذ عماد السامرائي
بالنسبه لموضو فلسطينن كان ممكن من لبدايه وقبل ما يبقي للاسرائيل دلوه ومن ايام العصابات الصهيونيه كانت المقاومه هنا هتوقفهم عند حدهم ومكناش بقينا فاللى احنا فيه دلوقتي
بالنسبه لاننا نسمي القضيه بالاسلاميه فمع احترامي لرأيك وكلامك الا اني مش مقتنعه خالص
بلاس نحشر الاسلام في كل شئ فاللي بيقتل ويرهب اخوانه يقولك جماعه مش عارفه ايه الاسلاميه مع انه الاسلام اول من قال لا تروع الامنين؟
عموما القدس زي ما فيها الاقصي فيها كنيسه القيامه ولو قولنا نحرر القدس هتلاقي حمله صليبيه تقولك نحرر كنيسه القيامه من ارهاب المسلمين وطبعا انت عارفه انه ده كان السبب المعلن للحمله الصليبيه القديمه رغم انه الهدف استعماري
بلاش نحشر الاديان ونقول نحرر فلسطين لانها عربيه واهلها هم اهلنا وناسنا واحنا متربيين علي كده فانت م منا ونحن منكم
تقبل تحياتي
في11,تموز,2007 - 02:56 مساءً, الم_______________هدي كتبها ... (غير موثّق)
........................................................................................................ ايها المد و نو ن....................اني ارا كم في الظلا ل البعيد..!!!!!!!!!!!!!
في11,تموز,2007 - 03:00 مساءً, cindrella كتبها ...
ام هدي (المهذي سابقا)
اني اراك في مستشفي المجانيــــــــــــــــــــــــــــــــــــن
في11,تموز,2007 - 03:08 مساءً, دولة الهانم كتبها ...
مين صحيح ..... تفتكرى محدش عرف الحل .... شكرااااااااااااااااا
أنا فقط نزلت البرنامج اللى أرسلت لى عنوان موقعة... و على رأيك طلعت قماش
في11,تموز,2007 - 03:08 مساءً, عبد الرحمن القادري كتبها ...
دعيني اليوم أقتحم عليك حرمة المدونة
على اني لم أزرها الا اليوم
لا أريد أن أعلن غير ما أجده من نفسي واجبا باعتباره هو الذي كان
" معالجة غاية في الدقة و روعة في المعاني"
أنا معجب بالمدونة
أرجوك تفضلي بتوقيع حلقة ثالثة من ذكريات حب قديم
شكرا
في11,تموز,2007 - 03:12 مساءً, cindrella كتبها ...
دوله الهانم
اصلي كما تعلمين عبيطه وساذجه وتلاقيني معرفشي هم مين الله لا يريحهم ابدا
بالنسبه لموضوعك عيب تقولي شكرا لاني لم افعل شئ ونحن في الهم سواء
بس جربي الحل التاني هتلاقيه صح واضح انه العيب من عندنا
انا بفكر افرمت لجهاز بس خايفه
تحياتي
في11,تموز,2007 - 03:14 مساءً, cindrella كتبها ...
عبد الرحمن القادري
دى مدونتك وانت تشرفها اي وقت ولا اقتحام ولا حاجه
علي فكره مدونتك حلوه قوي وموضوعك جميل
تقبل تحياتي
في11,تموز,2007 - 06:15 مساءً, abeer كتبها ...
كتاكيت كتاكيت بس نعيش
بكره نكبر ويطلع لنا ريش
ويجى ديك منفوش الريش
يجيب عاليها واطيها
ويغير كل اللى فيها
واحنا بهمه نمشى معاه
وإن فكر يمشى على هواه
نتلم ونديله على قفاه
---------------------
تحياتى
ــــــــــــ
في11,تموز,2007 - 06:21 مساءً, مغترب في بلاد العرب كتبها ...
الدرس واضح جدا.....بابا الكبير واحنا الكتاكيت...دايخين على طول وتعبانين...وبيهزوا فينا ليل نهار.....صوصوصو صوصوصو....الكرتونة ديقة ليش....
في11,تموز,2007 - 06:31 مساءً, Ola El-Fouly كتبها ...
صديقتى الغاليه سندريلا
د.وائل ارسل لى ميل الأستاذه هدى و نص رسالتها وان شاء الله انتهى من الرد فى اقرب فرصه وبالنسبه لترجمه الأيات والأحاديث فطبعا هى صعبه لكن اعتقد ان فيه مواقع على النت ممكن تفيدك انا مع الأسف لا اعرفها لكنه مجرد اقتراح ممكن مواقع زى الأستاذ عمر خالد او اسلام اون لين وغيرهم ممكن يساعدوكى فى ترجمه الأيات و ممكن ينشروا الموضوع او يوجهونا للطريقه المناسبه للنشر وعلى كل حال ابدئى ومادام الموضوع لله ان شاء الله ربنا يسهل سلام
علا الفولى
في11,تموز,2007 - 06:32 مساءً, cindrella كتبها ...
العزيزه عبير
ههههههههههههههههههه
حلوه قوي
زي المثل اللي بيقول سيب حبيبك علي هواه لحد ما يجي ديله علي قفاه
بس بزمتك احنا مش سايبينه كتير قوي كل ده ولسه ديله معرفشي سكه قفاه؟
ده كرشه واسع قوي بقي
تحياتي يا مبدعه
في11,تموز,2007 - 06:33 مساءً, cindrella كتبها ...
مغترب في بلاد العرب
صوصو علي قد ما تقدر طول ماحنا في الكرتونه مفيش ايده
تحياتي
في11,تموز,2007 - 06:37 مساءً, cindrella كتبها ...
العزيزه علا الفولي
انا مش متاخره ولكن زي مانتي عارفه مش هنضيع وقتنا في لا شئ
يعني لو مقيمه في فرنسا كما قولتي يبقي يترجم فرنسي مش انجليزي وده ليه حله كما قولت لك
والدكتور وائل تفضل مشكورا وبعتلي نفس الرساله وانا بعت اسأله عن لغه الترجمه لاني مش عاوزه نضيع وقت ومجهود وفي الاخر بلا فائده
الموضوع مش هيبقي ليه لزوم لو نزلناه في مدوناتنا؟
لانه في الاخر احنا بس اللى هنشوفه
لكن رأي ومن البدايه هو
1- نبعت ردك كما هو للمحاميه وبالعربي عادي لانه هيكون لها شخصيا
2- نبعت الرد مترجم بلغه البلد اللى فيه نوال السعداوي كنوع من الرد علي مقالاتها في هذه البلد وحتي لا يتعاطف معها الرأي العام هناك ويعرفوا الوجه الاخر للحقيقه.
تحياتي
في11,تموز,2007 - 06:39 مساءً, Ola El-Fouly كتبها ...
صديقتى الغاليه سندريلا
الكتاكيت تعبوا اوى يا صديقتى من كتر الجرى ورا لقمه العيش والعذاب فى المواصلات والتعليم والبطاله والفساد بيمرجح الكرتونه لما قربيت الكرتونه تتخرم والكتاكيت يموتوا من الغيظ والتعب ويمكن من الجوع ربنا يرحمنا برحمته اما الفزوره فسأتركها لفراسه قارئ اخر لك تحياتى
علا الفولى
في11,تموز,2007 - 07:19 مساءً, طارق محمد على كتبها ...
سندريلا
تحياتى الخالصه للكتكوته الفصيحة اللى ارسلت هذا الموضوع الرائع كما ارسل تحياتى لجميع الكاكتيت فى مصر و وعلشان الاخوة العرب ما يزعلوش فانا ابشرهم قربيا بانهم سوف يصبحون كاكتيت بس احنا الخبرة برضه ...
وربنا يستر علينا من اعين التعلب الكبير والصغير ......
الافوكاتو المصرى
في11,تموز,2007 - 07:24 مساءً, أسامة مصطفى كتبها ...
الأخت سندريلا
يبدو أن هناك سوء فهم بخصوص التعليق الذي وضعته
فأنا لم أقصد سوى الدعابة من ورائه
يبدو أنني بالفعل أسأت اختيار الكلمات وخانني التعبير، فمعذرة، لم يكن غرضي حتما ما فهمته..
آسف لهذا الخطأ الغير مقصود
تحياتي
في11,تموز,2007 - 07:31 مساءً, نانى المصرى كتبها ...
اختى العزيزة ..سندريلا
اعزرينى فى تاخرى فى العليق على موضوعاتك ..وهذا الادراج يعتبر ادراج وطنى خالص وكان نفسى نعمل اى حاجة للكاكتيت دى .بس الظاهر انهم بقوا مدمنين للدوخه ..
في11,تموز,2007 - 08:00 مساءً, cindrella كتبها ...
الصديقه علا الفولي
طيب مش ان الاوان للكتاكيت دي انها تكبر وتقاوم ولا حتي جتتها تنحس وتبطل تدوخ وتفوق لروحها
هقولك ايه بس
انا كمان سايبه الموضوع لفراسه القارئ هههههههه
انا مستنيه ردك انتي ودكتور وائل علشان نخطط هنعمل ايه
تحياتي صديقتي العزيزه
في11,تموز,2007 - 08:01 مساءً, cindrella كتبها ...
طارق
هههههههههههههههههههههه
حكايه التعلب الكبير والذئب الصغير دي ملعوبه والله
بس يا صديقي العزيز احنا كلنا ما بين كتاكيت او فئران علي رأي الاستاذ عماد السامرائ
لانه كله عند العرب صابون
تحياتي يا افوكاتوا يا هايل
في11,تموز,2007 - 08:03 مساءً, cindrella كتبها ...
الاخ اسامه
لا داعي ابدا للاسف لانك اكبر من كده
انا كنت متأكده انه ده مش قصدك لانه ثقافتك وعقليتك بتقول كده بس الموضوع كما تفضلت وقولت سؤ تعبير او بمعني اصح نظرا لاننا لا نعرف بعض التهريج من الجد مبيبقاش واضح
تقبل تقديري واحترامي
في11,تموز,2007 - 08:04 مساءً, cindrella كتبها ...
العزيزه ناني
اتمني انه اللي يشغلك عنا يكون كل خير
وبعدين ومين مش عاوز يعمل حاجه للكتاكيت وخصوصا لما نبقي منهم وفي الهم سواء
تحياتي ولا تغيبي علينا بتوحشينا
في11,تموز,2007 - 08:05 مساءً, عماد كتبها ...
الهيلة سندرييلا
ايه الابداع ده
تريحهم يتعبوك تتعبهم يريحوك
فكرتنى بابليس اللعين لما واحدة ست عجوزة وقفت على شط البحر فقابلها ابليس وقالها انت عايزة ايه قالت له انا عايزة اعدى البحر فلما راها ابليس اللعين عجوزة قال احملها على كتفى وشق بها الماء فلما وصلت الى نصف البحر تبولت عليه فقال لها لماذا قلت له الستات يابنى كده تتعبهم يريحوك وتريحهم يتعبوك 0
اما حكايتك دى ممكن نقول الكتاكيت تعبوا وخلاص على وشك الانفجار ومعدوش لاقيين اكل هييجى الوريث بتاع سيدنا يحبسهم هوة كمان متهيا لى عمر سليمان هو اللى هيحبس الكتاكيت المرة الجاية 0
تحياتى ومعدتيش تتكلمى فى السياسة علشان خللى السياسة للاستاذ سيد مختار لانه بايع القضية اما انت فرقيقة ولا تتحملى قرف الليمان واسالينى انا على الليمان واللى فيه
تحياتى لك ياهايلة ياسندريلا مصر
مصرى
في11,تموز,2007 - 08:16 مساءً, cindrella كتبها ...
الصديق عماد
والله انت اللي هايل ومبدع
خلاص بقي انا هتغر بروحي ومحدش هيعرف يكلمني ماهو عماد رايح جاي مع الاسماعيليه يقولي يا هايله .
يا سيدي لا ابداع ولا حاجه دي قص ولزق من ايميل لصديقتي ولا اضفتش حتي كلمه واحده
بس الموضوع والقصه بصراحه كانوا رائعين فحبيت اشركوا فيه
بالنسبه للابليس والله الاب وابنه العن منه ولهم افكار اشر منه وقانا الله شرنا وسقانا من اعمالهم
وبعدين بقي انت دوختني يا عماد
اكتب في مواضيع تانيه تقولي ركزي علي السياسه !!! اكتب في السياسه تقولي ابعدي عن التعابين سكتها وحشه!!!!!!!! طيب اروح فين؟هاقطع نفسي بقي
وبعدين هو انت تعرف ليمان منين؟
يالا اعترف بسرعه
تحياتي وتقديري
في11,تموز,2007 - 08:18 مساءً, cindrella كتبها ...
عماد بقول
وقانا الله شرهم وسقاهم من اعمالهم
لزوم التصحيح
في11,تموز,2007 - 08:23 مساءً, meriam ld كتبها ...
تحية اسلامية عطرة لك حبيبتي cindrella
أولا اشكرك على شعورك النبيل و كلماتك الطيبة و انا معكم على طول ان شاء الله
انت كلك ذوق و رقة و ما شاء الله عليك و على ابداعاتك و عندك حق لما قلتي (حقا كلنا نعرف الدرس ومن الفئران الي الكتاكيت يا قلبي لا تحزن فكلهم في الكرتونه سواء )
نسال الله الرحمة و اليسر
تحياتي و مودتي
اختك مريم
في11,تموز,2007 - 08:43 مساءً, cindrella كتبها ...
حبيبتي مريم
انتي فينك وحشتيني قوي
لا بجد زعلانه ليكي مده من غير حس ولا خبر ولا تعليق جديد
ده كلام ده؟
لا متتأخريش وبكره اشوفلك موضوع جديد ماهو لما انتي واللى زيك يكسلوا مين هيكتب؟
بتوحشينا يا بنوته
تحياتي وقبلاتي
في11,تموز,2007 - 08:47 مساءً, طارق محمد على كتبها ...
سندريلا
نصحية منى بلاش سياسة الكاكتيت دى لان نهايتها معتقل وانا بصراحة مابحبش احضر فى القضايا دى لان كلها خسرانه وانا موش بحب اخسر قضايا خاصة اللى ضد الدولة
ولاننى لو ترافعت فى هذه القضايا فان مصيرى سيكون معروف ....................÷ومن الافضل ان نكتب عن الفن والفنانين والكرة الحاجات دى بيحبها اخونا كبار الكاكتيت
في11,تموز,2007 - 09:14 مساءً, هبه خطاب كتبها ...
الغالية ..سندريلا
مررت للسلام والسؤال على صحة الكاكتيت يا ترى هم بخير ...يا سلام لو الواحد يجيب شوية كاكتيت ويعمل معهم التجربة دى ...
في11,تموز,2007 - 09:51 مساءً, الم__________هدي كتبها ... (غير موثّق)
.............................من انكر المهدي فقد كفر..... ومن عصى المهدي عصى الله ....ومن اذى المهدي با رز الله با لمحا ربة ..
والسؤا ل الملح:: لما دا تفضلون الرسول محمد ..عن الرسول المهدي .. اليس المهدي با عظم الرسول واحب عند الله واعز وفضله الله عن جميع الرسل.
هدا سؤال:
من لم يجب عليه اليوم***سوف يجيب عليه في قبره في اول يوم
في11,تموز,2007 - 09:57 مساءً, cindrella كتبها ...
بقي كده يا طارق
مكنش العشم وانا اللى كنت فاكراك هتدافع عني وتلم المدونين وتعمل مظاهره وتقول الكتكوته لازم تنزل هههههههههههه
ماشي يا عم بس انا عموما مش بتكلم في السياسه وعلي فكره مش خوف والله
بس مش بحب اتكلم في مواضيع ملهاش حل وملهاش اخر
يعني اللى مموتين روحهم وعاملين بتوع قضيه الوطن بيعملوا ايه؟
ولا تعالوا نتلم ونورح مش عارفه فين؟
لا هو هيروح ولا حد هيروح وكله كلام في الهجايص علشان يهل علينا بطلعته البهيه ويبقي في الاكثر تعليقا ليس الا!!!!!!!!
لانه اللى عنده قضيه يا طارق ميدورش زى الدلاله علي المدونات ويقول تعالوا نصرخ ونلطم ده كلام فارغ وعيب علي الناس الكبار تعمل كده
عموما يا سيدي وقانا الله شر السياسه واللى عاملين روحهم بتوع سياسه
انا عندي قضيه اهم وهي الانسان وازاى يكبر وينجح وننمي مواهبنا وربنا يقدرني ويقدركوا عليها لانها القضيه الاصعب
تقبل تحياتي وتقديري يا اخي العزيز
في11,تموز,2007 - 10:01 مساءً, cindrella كتبها ...
حببتي هبه
ماكنتش اعرف انه عندك ميول عدوانيه كده؟
ليه يا بنتي دانتي بنت ناس ورقيقه حتي انتي عاوزه تعزبي الكتاكيت؟
طيب عندي اقتراح
خدي ام هدي (المهذي سابقا) وهزيه
اعتقد ده ممكن يعقله
تحياتي يا غاليه
في11,تموز,2007 - 10:02 مساءً, cindrella كتبها ...
ام هدي (المهذي سابقا)
بقي انت افضل من النبي محمد عليه افضل الصلاه والسلام؟
عموما ليس علي المجنون حرج
وبكره ان شاء الله لما تندلق وتموت غير مأسوف علي امثالك من الضايعين والمختلين هتعرف الاجابه كويس في قبرك يا اقرع
يالا من العباسيه والي العباسيه تعود هههههههه
في11,تموز,2007 - 10:10 مساءً, True Face كتبها ...
سندريلا
في الحقيقة ماليش في الفوازير ولا الكتاكيت أصل أنا كنت علمي رياضة........
لكن لو تديني أعداد الكتاكيت وأسماؤهم واعمارهم أعمل لك بيان محصلش..
بالمناسبة مالمحتيش أي كتكوت احتمال يبقي ديك لسة فايق؟؟؟؟؟ جايز
دمت بخير بعيدا عن الفوازير وياريت لو عرفت الحل تقولي لي
تحياتي وتقديري
في11,تموز,2007 - 10:11 مساءً, أم إبراهيم كتبها ...